Abwaan maxamed ibraahim warsame "{hadraawi}" maansadii anuubaa hooyadaa ah

 Abwaan maxamed ibraahim warsame "{hadraawi}"

maansadii anuubaa hooyadaa ah

waxay curatay 26kii apriil 1998

Hunguri calafbaa xukuma 

Hantina dhaqanbaa shushubaa

Dadkana hiddihiisa guud

Wixii la hayaa dhexyaal

          ✷✷✷

Xaq iyo u hal-buuxintiisa

Haboonkiyo waalid tiisa

Hilbiyo ku arooridooda

Siduu uga hawl yaraysato

Halmaan laga yeeli maayo

Hawiyo tumashooy dhashayda

Kadaa gacan-haadiskaaga

             ✷✷✷

Barbaar hanaqaad ku leexday 

Duciyo habaar qaadan waayay

Cir iyo heeguu noqdaa 

Hadhaysa dhul aan aqoonee

Hoygii madhan wiilashiisa

Haween dumarbaa ka sheegta

Hablaha kacaybaa u yeedha

Haldhaa jecel baa u qaybsan

             ✷✷✷

Inaan hadlo maan jeclaysan

Baxnaanana maan horjoogsan

Hubsiinana maan ilaawin

Hogeediyo xaajadayda

Dareenka haloosigiisa

Hu'giisa inaan ka qaado

Hayaanka fogaadaybaa leh

             ✷✷✷

Markaan cidla hiil ka waayay

Naftayda halaan halkeeda 

Waxaan huri waayo sheego

               ✷✷✷

Haantii lulataay dhageyso

Hoobaanta agtaada taala

Hadhiinadu baadi weeye

Hashii korisaa u ciillan

            ✷✷✷

Qofaad halab saaridiisa 

Daryeelka horseedidiisa

Dedaalada heensihiisa

Habeena ka seexan weyday

KU meel maray heegantaada

Markuu hagar kuu baneeyo

Dharaar ku haleeli waayo 

Hortaada waxaa yimaada

Sidaad ugu heellanayd

            ✷✷✷

Harraad iyo waa kalkiisa

Hilaac baxayoow dhageyso

Siday talo kaaga hoostay

              ✷✷✷

Calooshu intay ku hoysay

Hiyigu ku baxnaaninaayey

Horaadka intaad jaqaysay

Dhabtaydu intay ku haysay

Intaad huwanayd taftayda

Hobeeya hobeeya hobeeyada

Intaan dusha kuugu heesay

Intaan hanad kuugu yeedhay

               ✷✷✷

Hawraaraha kugu amaanay

Intaan hubin kuu xamraay

Dartaa aan u hogaansanaadey

Hadhuubada aan ku siiyay

Habniin adigoo ku diiday

Intaan hambo kuu daboolay

Hamuun iyo gaajo qaatay

Adoo haqab beel ku seexday

             ✷✷✷

Intaan hurdo kuu ilaaway 

Ilaashay hareerahaaga

Hungaa i xasuusinaysa

Hayaydana meel shishaa leh

Hilowga naftaa aloosan

Kashaa hinqanaysa goorba 

Hankaa i waraysanaaya

Tolow hebel mee ku foogan

              ✷✷✷

Aniyo hirashaa is weynay

Hiigsiga noloshaa adkaaday

Aduun iyo haybsigiisa

Hangool li'idaan ku daayay

Waxaan ku hagaagi waayay

Dhankaad ku hagaagsanayde

             ✷✷✷

Adoo ka hanweyn xagayga

Qof kuugu han weyn dantiisa

Cidaad ku haleysay mooyi!

             ✷✷✷

Halyeynimadaada sheelan

Habawgiyo dhiirintiisa

Ayaan halis kuu tusyne

Intaan kugu hawlo-daaley 

Intaan kugu hoodo-sheegtay

Intaan hebla kuugu faanay

Hilaado fog bey lahayde

Inaan hafarkaaga qaato

Sidaad ku heshaa da'a weyne

Adiyo habigaaga mooyi!

              ✷✷✷

Habaaska inaad cantuugto

Adoo hanaadaan ka doortay

Xagayga hibaan ku saaray

Anigu ku habbaari maayo

Huqbaase ku raadinaysa

Hibaaq xalan maad ahayne

Hufnaanta dhibtii abuurtay

Inaanay hadhayn yaqiinso

             ✷✷✷

Hawaala aduun rabbaa og

Dadkuna kala hoodo weeye

Haddeer iyo tii haddeer

Hadhow iyo tii hadhow

hoosiyo sare tii ku raacda 

Anuubaa hooydaaya.

                                                                    DHAMMAAD